St. Paul hospital

今日要返家了，

前後住左6日5夜，

因為阿仔係原定計劃要出院個日要照燈，

所以我決定同阿仔住多一晚！

好唔捨得呀，

好似去左一個短trip咁，

我有小小唔想走呀！

醫院feeding room d 姑娘好好人，

我第一次做媽媽，

當然有好多問題，

但佢地都好有耐性去解答，

可能每日都去feeding room 幾次，

開始餵母乳的時候去更多，

所以同幾位姑娘已經好似做左朋友咁！

阿仔自出生開始佢地24小時有姑娘照顧，

我呢個阿媽係醫院休息時間一定比係屋企多。

而且佢地好專業，

有佢地照顧我其實更放心囉。

講真，有佢地照顧，

我呢d產後孕婦先可以真正休息到。

不過無辦法啦，

唔通係到住足一個月咩，

係時候要靠自己，

因為返到英都係靠自己嫁喇！

衷心多謝feeding room 所有姑娘，

最傑出個幾位我已經向意見書表揚你地嫁喇！

有機會的話，下胎見！

我是媽媽了！

今日生完第三日了，

精神非常好！

好感恩，星期一開刀過程好順利，

加上早上7點才到港的陳生，

亦都可以順利趕到入手術室，

（手術約左係早上呢！）

陪我過我地最奇妙的一刻呢！

陳bb 就係半身麻醉情況下出世了。

陳bb重6.8磅，

好可愛呢，我覺得超級似陳生呀！

係自己個肚到住左10個月，

出左世見到真人，

個種感覺真係非筆墨可以形容！

希望你永遠都健康平安快樂！

而我第一日開刀後不能下床，

子宮收縮都不太痛楚，

第二天拆了尿喉後， 

醫生要我下床行下呢！

下床嘅感覺超級痛，

大約堅持左十分鐘，

我就上床瞓翻3小時。

好彩3小時後，

我再下床已經無咁痛了，

仲唔洗陳生扶我去洗手間呢！

(其實係因為有人見我瞓左去shopping 囉!)

不過無論如何，

之後上下床都無乜問題了，

當然話俾你知一點感覺都無係騙你啦，

始終開左刀，有個傷口，

點會無感覺呢？！

(想想自己不小心介到手都會痛啦，

更何況一個咁深的傷口呢？)

行路，上下床都要就住就住嫁喇，

不過感覺都可以接受，

起碼我無因為開刀後痛楚後悔開刀啦！

當初我選擇開刀，

就係因為我不想承受陣痛唔知會帶來幾多個小時的痛楚！

（我認我無好驚呀！）

而家總算過去了，

星期五就會出院回家了，

開始要面對24小時照顧初生嬰兒的挑戰！

阿仔肚餓時喊得好勁呀！

陳媽媽話似我，夠惡喎！

老實講住左5日私家醫院，

感覺真好，

起碼出世後幾日，

你可以瞓足精神，

唔洗心掛掛掛住個bb。

不過開心日子太短了，

仲有2日就要回家了！

如果香港有台灣個d月子中心你話幾好呢？！

心情沈重

明天晚上就要如期入醫院，

準備星期一早上開刀了，

唔知點解，心情有點沈重！

本來應好好期待呢一天的來臨，

但現在我反而有點捨不得呢個大肚子！

是的，

求子過程真的不容易！

長達差不多3年抗戰，

先等到呢個美好的消息，

當初我同陳生還打算，

如果再試多2年都無聲氣的話，

就會試做人工受孕，

如果都係不成功的話，

我地就決定好好享受人生吧！

反正無兒女責，

我地就更隨心所欲！

今天美好的事差不多就會降臨了，

我反而習慣了日日都帶住呢個大肚子！

可能仔仔非常錫媽媽啦，

我全個孕期都非常舒適，

連妊娠紋都沒有，

所以我並不覺得懷胎十月很痛苦呀！

倒數時候開始了，

雖然對未來充滿期待，

但同時又覺得好依依不捨，

我亦都非常掛念陳生呀，

由我回港到星期一開刀，

足足有三個月沒有見過他了，

雖然我地每天都通電話，

一有時間就傳短信，

但我都好掛念他呢，

小別勝新婚過然利害！

雖然陳生只會短短留數天看我，

但都意味住我可以返英國家的時間不遠了。

好期待返去一個真真正正係我同陳生的家呢！

we are ready!! 

38W

好驚呀！

仲有5日就到開刀日子，

今日就已經38週了，

好驚阿仔提早報到！

唔好嚇我啊， 

仔仔乖乖的住多幾日，

等埋爸爸過幾日返來先好出世呀！

老實說，

全個孕期，阿仔都好錫我，

我無嘔，無沒有胃口，

腰沒有痛，

無成日肚餓，

因此都沒有重太多，

暫時重左24磅啦！

（雖然我媽覺得我個口食不停，

因為我係零食王啦！）

腳腫都不算嚴重，

反而之前坐飛機返港，

腳腫得更嚴重呢！

行得走得，食得瞓得。

左鄰右舍都同我媽講，

你個女陀得好輕鬆呀！

只係最後呢2星期，

個肚好頂，

晚餐要盡量安排在7點前，

多d時間消化，

瞓個陣就不會有頂住個心口的感覺！

個感覺有些許似火燒心呀！

所以仔仔你要繼續乖落去，

住到星期一先好出來呀，

如果唔係阿媽會好驚嫁！

乖仔你乖乖哦！

期待星期一與你見面！

聖誕禮物

仲有十幾日就到聖誕節了，

今年雖然我人不在英國，

但都已經買左4份禮物俾陳生個邊d細路。

無謂要小朋友失望啦！

Black Friday 額外折扣下，

4件禮物都唔洗100磅，

算係好平啦！

陳生打開左個盒後笑我。

<So generous you buy them a car park and houses already ... Lol>

我只可以話，

我都係從小教導佢地啫！

走佬袋

差不多38W，

今次真係要執走佬袋。

其實應該早d執嘅，

有咩事起上黎，

一手攞袋走得。

不過我見我自己都仍然好輕鬆，

所以拖到而家，

點算下，

有咩未買就要買了。

其實都無乜特別嘢要執嘅，

醫院乜都有得供應，

主要都係一d私人用品啦！

而家諗緊夠竟攞唔攞罐奶粉去醫院呢？

下星期二最後產檢！

祝一切平安，順利！

Baby shower

仲有大約2星期就可以見仔仔了！

今日我最愛的家人就為我攪左個baby shower!! 

真係好開心，

叫左我身邊最要好的朋友參與，

熱熱鬧鬧，開開心心食左一餐。

個backdrop同牙簽圖案係由我2姐夫包辦的呢！

說來話長，

本來我係網上訂左，

陳生收到後當日已經即刻寄出。

前後大約十天左右，

可惜到尋日(星期六)都仲未收到呢！

超級煩惱係香港邊到可以買到裝飾，

因為baby shower始終都係鬼佬嘢，

香港行左幾間都唔見有，

Even 萬能的淘寶都無呢！

之後我就打算上網揾d free printable baby shower banner自己印，

但當然家印效果一定一般，

始終我地都係用普通紙。

後來我姐就叫我姐夫係自己廠印啦！

效果超級滿意呀，

早之效果咁好， 

當初就唔曬錢買啦，

又曬運費！

仲要收唔到！

精緻嘅食物，飲品，

就由我大哥負責！

當然唔係佢親自整啦，

雖然係外面訂，

但食物質素好好嫁！

美味的玫瑰味蛋糕，

來自ms b Cakery ，

真係好味，不太甜，

抵佢咁出名同咁貴！

仲有好受大家歡迎的macaroon ！

呢個同d熱盆都係係同一間買的，

Macaroon 從來不是我杯茶，

但呢個味道好ok 喎！

食飽飽，玩遊戲，

簡簡單單，

就估下我個肚有幾多吋啦！

結果無人估中，哈哈！

仲有問卷調查， 

多謝各位uncle auntie的祝福！

當然唔小得大家嘅禮物！

仔仔好幸福呀！

美中不足就係忘記同家人合照！

不過我玩得好開心！

Cake: http://www.msbscakery.hk/index.html

Food: Hong Kong football club 

黑麻油

今日係懷孕36週，

陳媽媽今天就開始煲薑醋同整黑芝麻油！

我就當然唔識煲薑醋，

所以真係唔知原來煲之前d薑係要先小炸過再煲的。

阿媽話咁樣d薑會香d喎。

不如講下黑麻油啦，

我估好多香港人就未必識了，

反而台灣人就好流行坐月子用黑麻油煮餸！

我媽呢就不是台灣人啦，

不過我媽就話小時候陳婆婆會整黑麻油幫我舅母坐月，

到左陳媽媽生我地個陣，

陳婆婆都會整黑麻油，

所以呢陳媽媽就知呢條秘方了。

咁黑麻油有乜好呢？

（網上資料）

可避免產婦便秘，也可去寒、補虛勞、養五臟、改善產後虛困。

製作方法其實好簡單，

先白鑊炒d芝麻先，

中火，大約炒5分鐘轉黃黃地色，

就可以加油。

之後轉小火，

我媽就加左舊薑tim，

大約小火煮30分鐘左右，攪掂！

之後就可以放涼，

待我生左之後，

就用黑麻油取代平時用的花生油/olive oil 煮飯！

好香呀，屋企傳來陣陣的薑醋味！

清胎毒

差不多懷孕9個月，

係時候要清胎毒了。

其實呢兩三星期已經開始食雞蛋白果腐竹糖水。

不過陳媽媽亦都煲左白蓮鬚俾我。

呢碗黑色的就係白蓮鬚。

入口有小小苦啦，

不算太差。

清胎毒主要都係要清走肚入面的垃圾！

咁仔仔出世時的皮膚就會好d。

咁白蓮鬚係乜東東呢？(網上資料)

白蓮鬚乃蓮花的花蕊。

飲用時間: 

臨盆前一個月至十五天前飲用。白蓮鬚屬平性的食物, 無論涼、熱底的人都適合食用。一星期可飲用1至2次。

功效:

1)固澀 ~ 性平味甘, 有固澀(即止血)、補腎,、消熱毒之效, 而雞蛋則有蛋白質, 此糖水確有助防止生產時大量流血的作用。

2)補腎 ~ 由於孕婦需要養胎, 腎氣一定有損耗, 具補腎作用的白蓮鬚能使孕婦生產時有氣力, 生產過程會較順利。

3)解胎毒 ~ 所謂胎毒, 是指孕婦身體內因常吃油炸食物而產生的「血熱」, 令嬰兒出生後易生瘡、奶癬等皮膚病。

不過要提提各位，

白蓮鬚千萬唔好太早飲用，

大概懷孕9個月開始先好飲。

最好就去問下中醫，

因為我都有聽過有人飲用後頭暈同嘔，

我飲完之後就無事，

不過費時出麻煩，

大家都係自己決定好！

10斤薑都準備好了，

阿媽話俾佢曬乾幾日，

星期三就可以煲了！

懷孕35週3

差不多懷孕36週了，

今日去左產檢見仔仔！

美腿！

仲有大約三星期就可以見到仔仔了。

今日醫生講解手術過程！

了解多d等自己個心定d啦！

希望到時候順順利利！

Disneyland

懷孕34週，

帶著大肚子去遊迪士尼樂園！

是關我哥跟我姐係11月之星呀！

一早book了當天12點lunch buffet！

係餐廳遇見4位卡通人物！

你估下我可愛的姨甥仔鍾意邊個最多？

答案一陣開估，

現在送上姐姐同男朋友的合照先！

姐姐好happy 呀！

自助餐只有2小時，

食飽飽後我地一行8個大人，2位小朋友，

就向樂園出發！

機動遊戲，場內環境就不多作介紹了。

遇到今次去有夜間巡遊就放幾張相俾大家睇下啦！

晚上7點巡遊開始，

街上的燈都會因為巡遊關係熄掉！

表演完都差不多7點半了。

去多個洗手間，

再去多個大街shopping ， 

迪迪尼之旅就此完美結束！

大家都玩得好開心！

好而家就開估，

答中無獎嫁！

登登登登

米妮是也！

男仔之家，

你睇下佢氹得米妮幾開心，

佢同米妮講，

我好鍾意你啊！！！

再來個抱抱。

米妮用佢個大鼻子錫錫！

煲薑醋

開始進入直路了！

倒數最後5星期，

就可以跟我的小寶貝見面了！

心情現在仍然很平靜，

我想大概踏入12月吧，

到時候只淨2星期，

希望不會瞓唔著啦！

今個星期懷孕34週，

幸好什麼腰痛都沒有出現，

只是肚子有輕微痛楚，

不知是否因為入盆所以痛呢？

不過幸好不是超級不適啦！

上星期訂的八珍甜醋今天已經送到我家了，

阿媽話下星期開始煲喎。

最後送上懷孕32週的照片！

希望阿仔乖乖平安健康出世。

32W Halloween

我今日Halloween ，

出去攪左一日，

好忙呀！

首先去左同姪仔扮靚，

因為佢學校有Halloween party，

畫左個Spider-Man 面！

佢都不執輸要同我個仔扮靚！

係家姐協助下，

2歲算係咁啦！

Hello baby!! 

之後去左同朋友食下午茶！

從未有如此一見如故過，

簡直相逢恨晚呢！

Pokka cafe的下午茶，

環境舒適，

又可以慢慢坐，慢慢傾！

100蚊左右一位，

好抵食喎！

有下次！

多謝美國朋友的禮物，

Baby 巧幸福哦！

呀，仲有一件開心事分享，

我們今日攞到新家的所匙了！

期待bb和我們住進新的家！